ياحبيبي الروح حنت..

يا حبيبي الروح حنت وآنه للملكَه اشتهيت
لا تضن حصلت سلوه بغير شخصك والتهيت
مني تستاهل عذابي ومو ندامه شماتنيت
مالكَت مثلي التدور والله بس آنه لكَيت
كلشي غيرك ما اريدن كلشي غيرك ما هويت
اكَعد وياك بصريفه جني جاعد بارقه بيت
لا جعت يمك ملذه وهاحلاهه لا عريت
يا أعز الناس عندي توفي والله ما وفيت
يلي جلماتك ربابه او ويه نغمتهه غفيت
انته شمعه كَبال عيني اتعيش لو مره انطفيت
اسهر اليل بحديثك يسري وانته ما سريت
يابعد كل السوالف ماوصلتك من حجيت
خلتك شيلة جماعه شماغبت وشمابطيت
انعل الجابك عليه كَلي بالله منين اجيت
روحي متحذره وتهاوش خملت اشويه وسطيت
ليله وحده ومن عكَبها اترعرعت بيه وربيت
لني اشوفك ماكو مثلك وانز منك لا طريت
روحي بجويد تدردم اسمع اتكَول انوليت
من شفت مخلاص ماكو مددت رجلي وبجيت
يمقطاطه وقلم روحي صابر آنه شما بريت
يلي مي خابط شربتك بردت كَلبي وصفيت
شرد اوصف ضيم حالي ماي وبرمله انجفيت
ارجف بتموز منك دثروني ولا ديفت
عمري مديور اعله عمرك امشي كَبلك لا مشيت
مثل ورد الشمس عمري يفتر وياك انتهيت
كل طمع ماريد منك لا ابيع ولا شريت
طلبتي كلش عزيزه بالقليل آنه اكتفيت
تذكر المسكين كَلبي ويه روحك لا خليت

تحياتي الكم وان شالله تعجبكم اريد تقييمكم