ابوذيااااااااااااات حصريا وبس ويانة 100 ابوذية ادخل وشوف

1_احبك واحب اسمك وفصلاك
وعليك القماش مكدر وفصلاك
واذا تزعل امر يمك وفصلاك
عشربوسات
لاوالله مية

2_هجم حبك على سنيني وغزلها
وروحي بمغزل الحسرة غزلها
القصايد بس الك يحلى غزلها
يابو شفايف عسل شسويت بيه؟؟

3_حبيبي شعطلك عني وماييت
الوسيعةضاكت بعيني وماييت
طريح بهجرك وناحل ومييت
من اشوفك ترد الروح بيه

4_صبرت وياك لحدماعجزصبري
واكل للروح هذا الكلب صبري
شجاك شغيرك يا ابن صبري
شفتني وماتجي تسلم علية

5_ترف عيني نتلاكة ونتسالم
خبط لوني بغرامك وانت سالم
كل يوم اندعيلك انت سالم
عسى لحظاتك كلها تمر هنية

6_وكع ميزاني من ثكلك ولا دك
وجهازي المايدك لاجلك ولك دك
اتصل بيك من وحدة والك دك
لان اثنينة نحبك سوية

7_حبيبي عليك دمع العين همال
غبت عني وزماني عليه هم مال
فديتك هم جسد هم روح هم مال
وانت بشوفتك تبخل عليه

8_عشكتك عشك بابل وسومـــــــــــر
وانا كلبي من العشك زنجر وسومر
جنت اشرب تتن دنهر وسومــــــــر
وهسة الاسبين غالي عليـــــــــــــــا

9_اريد ابجي وذب الدمع بسطول
وعدنا بحور ما تنعبر باسطول
جثير من الزلم يا خوي بس طول
ويصح زغير وافعالة بلية

10_بعد ما اوصل بعد دارك وطبهـــــــــا
يالناسي دوة جروحي وطبهـــــــــــــا
بدساتير العشك لحلف وطبهــــــــــــا
نارك للعطاشــــــــــة بغير ميــــــــا

11_انا الناوي اروحن ولا عـــــــــــــــود
لعزف الربابة يرهملي ولا عــــــــود
ولشخاط البقى بجيبي ولا عــــــــــود
وجيس التتن غالي عليـــــــــــــــــــا

12_وحك نبي طه وعيسى وصالــــح
بس اني مخلص لحبك وصالــــح
تظل تزعل عليا وصالـــــــــــــح
حلاوة العشك من نفرح سويــــــة

13_ازرع ورد واحصد شوك وجني
وغرامك بالف لهبة نار وجني
يجاسي الكلب دمعي حرك وجني
ولا نوبة عطف كلبة عليا

14_العشك من استراحينا وهدنة
واخذنا من الدمع راحا وهدنة
ياحلو الطول فك ياخه وهدنة
عجزنه من الهوا وناره سريه

15_زماني سلب من عيني وسنها
وعلي سيوفا جردها وسنها
انسمر كلبي ابظافيرها وسنها
وعفه كلبي شكثر يحمل اذيه

16_اريد ابتعد عن الشوك وخلاص
واشرد من غرام احلام واخلاص
بعد ما ظل وفه ايهل وكت واخلاص
وصفوا اهل العشك كلهم سويه

17_حبيبي وين حجيك وين وعداك
ابهجرك شمتيت اعداي وعداك
الدنيا اوياك حلوة اهواي وعداك
مرار وكل لياليها اذيه

18_شبابي شد على ارحاله وضعنه
وسالوفة بحلك شامت وضعنه
غطاها الليل اثاري وضعنه
وصفيت ابلا رشد فوك الوطيه

19_كلبي بالونين شلون يلام
وجرح الشوك حدر الضلع يلام
الماي التبده اشلون يلام
هويته وما يفيد اللوم بيه

20_اسهامك وصلن الجبدي ولاحن
وكلبك ما بجه الحالي ولاحن
ابليالي العيد لا افرح ولاحن
لجلك يالكطعت الوصل بيه

21_الدهر مايوم حن كلبه ولانه
تفاركنه ولف واشي ولانه
لانت تصون الحب ولانه
وظلمنه الشوك والعشره سويه

22_بمدرسه العشك لليوم طالب
ومن ربي وصال الترف طالب
ابنجاحك ياكلب لوردت طالب
ولو يوم امتحنك بيه اذيه

23_نفسك دوم حاسبها ولمها
تره امن ايديك مسرتها ولمها
فقير الحرص عالدنيا ولمها
وغني اليقنع ابرزقه لبلا شجيه

24_العكل يبني حكيم اليوم ونصاح
اترهدن وانعل الشيطان ونصاح
اشما ارشدك وعلم بيك ونصاح
تتوب وتوبتك حده اضحويه

25_الدمع نهران من العين ينساب
طريح اولا صفالي الوكت ينساب
اليسب الناس لابد يوم ينساب
ويظل مكروه مابين البريه

26_يليل الشوك امري اوياك فضه
وكلبي امن الكدر مايوم فضه
الكلام ابغير وسبب فضه
السكوت امن الذهب بين البريه

27_نهران الدمع عالوجن تجري
خساره اولانفع بالطيب تجري
المصايب لو على كل بشر تجري
فلا بطران يوم ايلوم بيه

28_لدك وانحب وخلي الشوك ينباح
واصرخ لمن صوتي اعليك ينباح
حشه السامع اشنفع الجاب ينباح
الوفي ميهاب حتى امن المنيه

29_انياب الدهر عظني ولاجن
ابهيمه ولاذره عندي ولا جن
رضيت بقسمه الباري ولاجن
اشوفه عد غيري وتشب نيران بيه


30_عكدت الكلب وسط الشوك باسلاك
ونذرت العمر وية الروح بس لك
احبك ولاتفكر يوم بسلاك
انة بنومي ويمر طيفك علية ..
.

31_بية جروح تنزف والم اعاني
حرت شحجي وشسولف والمعاني
الصف مثل ليرة والمع اني
ولاوحدة ردتهة ورضت بية

32_كلبي احترك من هجرك ولع شاب
وانة المتولع بحبك ولع شاب
دوة الدكتور ما ينفع والاعشاب
اطيب بطبت اجدامك علية

33_الك بايع دليلي وانتة حر بي
يتيم انة بجمالك وانتة حر بي
افجر كلمن يحبك وانتحر بي
لان مخصوص حبك بس الية

34_رسم بية زماني شلون خطة
بقلم من ضيم كلبي الوان خطة
ادك على الفرح مشغول خطة
يجاوبني الحزن ويرد علية ....

35_ثوب الحزن بفراكك لبسنه
وثكيل الطبع طبعه لو لبسنه؟؟
ولك خدك ماوصلناله لا .. بسنه
تزعل ليش يمدلل عليــــه؟

36_تظل صاحب فضل وشكبر فضلاك
وخلكي ما فضه الغيرك وفضلاك
اميزك عل خلگ كله وفضلاك
وبسمك احترز صبح ومسيه

37_عليك الليل كله انه ونه
ومعاك العتب هسه ان اوانه
اتهدد بالنفاها انه .. وانه
وينك مو طبك دهر العليه

38_غرامك اثر بالعشك وداره..
هجرت الي تعب وياك وداره..
سمعت بقيس عاف اهله وداره..؟
حملت الضيم وهمومك سويه

39_منو مثلي تعب لجلك وداراك ؟
جهنم لجلك اتحمل و(داراك)
عسا من غيرك يسمر وداراك
ابسكم لا للحيا ولا للمنيه

40_يكلبي غّرك الشيطان ولهاك
وخلّاك برحى الحسبات ولهاك
مشه عنك زمان الاخذ والهاك
اجه وكت اشبقه عندك اليه

41_قضية اسمك على اسمك ماشخطنة
ازدحام احنة على دربك وماشي خطنة
شتضن من كد حلاتك ماشخطنة
اليشوفك ينشخط مية بالمية

42_حبيبي شرد اسولفلك...ولكدر
والهموم مبن ماعاين...ولكدر
الي جان وكتي ...ولكدر
وصرت انته والوكت عليه

43_نوبه حلوات الليالي نوبه...مرات
وحبيبة الروح علي ما...مرات
مو مره الخنتي يحبيبه...مرات
تخونين وتصح بيه الاذيه

44_هذه الابوذية عن صديق غدر بصديقه
المغدور يقول ...

ولو مايسوى كلمة من اكتبة
ولكن سالفة ونكتة نكتبة
شنو حكم الغدر صاحب نكت بيه
عليه التف غفل لفة الحية

الجواب من احد الاصدقاء الخيرين ..

العقل بأمر الصديق ارجوك حكمة
وبدال النكتة خلي ايكون حكمة
اليغدر صاحبة مو مهم حكمة
المهم شلون نتلافة القضية

45_صرت كهوه لحبيبي بوسط فنجان
فن انس الي يوصله فن جان
اذا العاقل نضرلك نضره فنجن
وانه المجنون وتكلي انظر اليه

46_
47_انة الحزت الصبر والصبر حزني
والف وسفة اعلة سيف الظلم حزني
البحر البيض لون يلفيه حزني
يصير اسود بلون اليل مية

48_أزعل يا وطن وارجع اراضيك
وحن بغربتي لناسك واراضيك
بغير الفرح صدك ما ارى ضيك
واذا ًَمََرك حزن احسه بيه

49_حلو إسمك وأبوك شلون سماك
حبيبيك لو زعل وياك سماك
صرت سمچه وانت الصرت سماك
لو طحت بحنانك إعطف عليه

50_احبك من جنت جاهل واناحباي
مابطل وني عليك ونحباي
لون ينكضي نحبك ونحباي
يتلاكه هوانا جوه الوطيه

51_جنت انت المرض وانت دوالي
وصارت بالجدم منك دوالي
اهديتك گلبي وتگلي دولي
وصرت دم ودمع تذرف عليه

52_جمر دمعي عله خدودي ترى سال
كطعََّتّّّّ اخبارك حبيب تراسل
انه انسليت من هجرك ترى سل
وتون الروح وتريد المنيه

53_يمرمرني ويصيحن بيه همال
وترك دمعي عله الوجنات همال
تعدل حالي وبفركاه هم مال
تركني وراح ريته يعود اليه

54_
55_وحگ عيسى وحگ مريم والاحد
بعدهم ما تهل عيني عله احد
حفر گبري من اخذ روحي ولحد
وقروا الانجيل من صلوا عليه

56_زماني شما لعب بيه...ولهتم
والراده علي يسري...ولهتم
بروحي شماتغيرتوا...ولهتم
لان حبكم دوه لكل مرض بيه

57_كلبي من الحزن ورث...وعطاب
وعيني اعله الطالع...وعطاب
حنيت لزادك وملحك...وعطاب
لان بس ملحك الغزر بيه

58_جيتك وبظلام الليل ...عناي
وعزفت بروحي مية جرح...عناي
بعد ما ظنك تنشد...عناي
بعد هجرك يروح الروح اليه

59_مره اشوفكم مشمش...مرتين
وكلبي مو مره حب...مرتين
العنده مره هلكانوانه...مرتين
وحده ترفع والثانيه تكبس بيه

60_بنات الوكت يا ناس...مرضني
يرضي بيهن الكلب...مايرضيني
مره يقيني يصيب وياهن...مرضني
ضني بكيدهن ميه بالميه

61_فراكك هدني ولا خله بيه ابد حيل
وياهو اشكيله يكلي يستاهل والف حيل
كلما تدوس على كلبي اكولن بعد حيل
دوس وخلي الوجع يزداد بيه

62_نساك الطلع برة ونـتـناسة
يالعراق انت اهله وانت ناسة
يذكرك تراب الوطن وانت ناسة
لاتنسة الفرات من شربت ميه

63_لوما شفتك انه
متت من العطش لوما ... شفتك انه
اذا ما شفتك انه .... شفتك انه
ابكل الناس من تكبل عليه

64_قلم كلبي تداين ورقة منك
لأن ماكو بجمالك ورقة منك
وأسجلك أنت الأول ورقمنك
وأكتب لافته محجوز اليه

65_على جروحي أنا مثل أم لوليت
وكظيت بحبك أنا العمر لوليت
العدها عيون مثل عيون لوليت
خل تصيح بات وترد علية

66_الغيرك لاصفة كلبي ولاحن
ونجومك البسمة سطعن ولاحن
قصيدة حروفك أكتبهن ولحن
وسوي أسمك نشيد المستنصرية

67_وسفه الدهر شتتكم وطركم
حسافه ماكضه منهم وطركم
بذجركم هذا انه اهذي وكركم
يعيد الله شتتكم جمع ليه

68_زماني جرد اسيوفه وسنهه
عليه اوحرمت عيني وسنهه
وحق اللي فرض خمسه وسنهه
بعد هيهات عيش ايصير اليه

69_حبيبي دك بذرعانه ولجتاف
بضلعي جاسي اللبي ولجتاف
رضينه بحبس دندوشه ولجتاف
وهي سجاني وتفتر عليه

70_مر ولفي ايهبتني ومره هبته
ومره اوصلت يمه مره هبته
طحت مقدر يصاحب مره هبته
اسد يخسه الاسد ملقاه اليه

71_ابنار الهجر يامهجه دموعاي
على مصابي السمه يمطر دموعاي
اشما هلن يدندوشه دموعاي
حسناتج تبدل بالف سيه

72_حبيبي جفاك المعبودج صبراي
حبيبي كمت اكل للروح صبراي
حبيبي من ذكرتك نفذ صبراي
حبيبي يصب فراقك عليه

73_كل مغرم برت علته وناله
سعيد اللي حضه بشخصك وناله
الطارش من سمع نوحي وناله
ترك شغله وبجه رحمه عليه

74_يحادي روعت قلبي بلحداي
يخايب لفني وياهم بلحداي
اون طول الدهر حتى بلحدي
على الساروا وخلوني شجيه

75_وحك آية عصا موسى وسينا
الك حثت رجايبنه وسينا
الك حسن النبي يوسف وسينا
الي والنور الك والنار اليه

76_حزني عليك مايبطل وناحي
اسب اللامني بودك ونا حاي
تبات الناس مستوره ونا حاي
ليلي والنجم يشهد عليه

77_من مثلي دمع عيني يهلهه
سبب غالب على روحي يهلهه
وعلي تحيولكم ميت يهلهه
من تبدي ترد الروح اليه

78_وحم الالف واللامين والها
روحي بهوى ساهي العين ولها
لها ثغر وجبين وعين والها
خذ شبه البدر لو سطع ضيه

79_سريتوا بالضعن ياترف هاوين
جفيتوني ولعند الغير هاوين
هاميت يحلو الطول هاوين
حياتي والنظر اقبالك عليه

80_تظن انساك وانته الروح واسلاك
سبب مايوم مني انقطع وسلاك
أعيش آنه عقب فرقاك وسلاك
معافي والوشاة أعملوا بيه

81_مدري لاتناشدني على احشاي
بجيت وصب دمع عيني على حشاي
تبعت الضعن وكفوفي على حشاي
إشما مال الضعن روحي إتميل بيه

82_بودادك آخ للدلال فخار
جدب كلمن عليه الجد فخار
اختلاج الناس من صلصال فخار
وحبيبي اختلق بالقدره العليه

83_اعذرني والوكت عنك لهاني
بعزاك الزاد الي ابدا لهاني
تفر من البدن روحي لهاني
بسبب ماشالت التابوت هيه

84_وحق التعبده شيعه وسنه
ذوله الحرموا نومي وسنه
عليك اسيوف جردنه وسنه
علمك يلعبدت اشميت هيه

85_نصحته اولا نفع وياه نصحاي
سكاره احنه بهواه مابعد نصحاي
جفاني وصرت نصي ميت نصحاي
نحيل ولا اثر نكاد بيه

86_أنام وشوك محبوبي يعاني
افز مرعوب واتخيل يعاني
هلي الدمع مرخوصه يعاني
على اللي بالوصل شحوا عليه

87_اشمالك يازماني علي صليت
ابنار وحمسيت اجلاي صليت
مثل ماصلت ام عمران صليت
فنكحني الهوه وذبني بنويه

88_هذا البيه كنتم لايميني
وعذر مافاد بيكم لايميني
لو تكتف يساري وي يميني
هذاك انه الهوى غالب عليه

89_تظن انساك وانته الروح واسلاك
سبب مايوم مني انقطع وسلاك
أعيش آنه عقب فرقاك وسلاك
معافي والوشاة أعملوا بيه

90_يصاحب لو تشوف اشلون كتماي
على عيوني ويسح الدمع كتماي
اشما اقل للروح سر الهوه كتماي
تحن وتهيج الساكن عليه

91_قوم انصب يصاحب ماتم النه
على الوياه ليله ماتم إلنه
لون الرجل يملك ماتمنه
مهو بالهون فركاهم عليه

92_هذا اللي لعند اعضاي هد هد
ملهي وابد ماينصاد هد هد
اكله اقرب يقلي ليك هد هد
ارفع مشتهاك اشتظن بيه

93_عفاني جيف الى مهجه ولي روح
اداري بالعلل كلها ولي روح
ماني بحال من يبكه ولي روح
ابحالك يالقطعت الوصل بيه

94_تهت محد من احباب علي شار
ينجيني الذي شمسه علي شار
حجيت المصلحه طلعت على شار
رجيت الغانمه صارت رديه

95_المصايب بس على روحي تلافت
يقلبي اعله النكر طيبك تلافت
اون وعطامي بهجرك تلافت
طريح وساد دوب النفس بيه

96_دمه دمع البيابي سال وانهات
عليك اكضي العمر حسرات وانهات
بهواك انه اعذلتني الناس وانهات
ما خذني الهوه غصبن عليه

97_اف من زماني اه منه
على اللي عشرتي وياه منه
اكله الدرب هذا يكول منه
اكله فوت بيه يرد عليه

98_ابكثر مانوح ملوني يراني
طحت والشامت ابعينه يراني
يخوتي السبع من جسمي يراني
اكبال اهلي وعمامي اتشوف هيه

99_روحي والهوى ودنياي وعداي
علي وشلون اشيل الجدم وعداي
صابر وانتظر واشوف وعداي
ابفرح لو دوم وكتي محيط بيه

100_الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه

ااااخ ايدي كامت توجعني بس يروح الوجع من تكتبولي ردود
لاتنسوني بردودكم واذا احد بيكم راد ابوذيات بعد يدلل من عيني هاي قبل عيني ذيج
تقبلو تحياتي
سهر عيني